М. Әуезовтің «Абай жолы» эпопеясының жазылуы мен жариялануы

Аннотация

Мақалада қазақ халқының ұлы шығармасы М.Әуезовтің «Абай жолы» роман-эпопеясының
жазылу тарихы мен жариялануы сөз болады. М.Әуезовтің «Абай жолы» эпопеясын жазуға
кірісерден бұрын Абайдың өмірі мен шығармашылығын зерттеп келгенін, арнайы деректер жинап,
материалдар іздеп, бұрыннан білетіндерін толықтырып, көп еңбектенгені жайлы айтылады.
Авторлар М.Әуезовтің өз мәлімдеуіне сүйеніп, мақалада «Абай жолы» эпопеясына қатысты
материалдар тапшы болғандықтан, ақынның әдеби мұрасы басты деректерінің бірі болған деген
ұстанымды негізге алады. Жазушы Абай поэзиясын соншалықты терең түсініп, ақын жанының
қыры мен сырын тану арқылы Абайдың бүкіл болмыс-бітімін, тыныс-тіршілігін көзбен көрсетіп,
қолмен ұстата білді деген тұжырымға келеді.